DHARMA WACANA "RAHINA SARASWATI PINAKA CIHNA ILMU PENGETAHUAN SANE NERANGIN KAURIPAN"

RAHINA SARASWATI PINAKA CIHNA ILMU PENGETAHUAN SANE NERANGIN KAURIPAN

Suksma atur titiang ring ugrawakya antuk galah sane katiba ring sikiang titiang.

Inggih, nawegang titiang majeng ring Bapak Dosen sane wangiang titiang lan para mahasiswa sane baktinin titiang. Sedurung titiang maatur-atur antuk dharma wacana puniki, lugrayang titiang nunas ica ring Ida Sang Hyang Parama Kawi, duaning pasuecan ida, titiang sareng ratu ida dane prasida masadu ajeng ring genahe puniki, antuk punika lugrayang titiang ngaturang pangastungkara  panganjali.

OM SWASTYASTU

Inggih ratu ida dane sareng sami sane wangiang titiang rasa bagia manah titiang mangkin duaning kepaica galah jagi matur nganinin indik dharma wacana sane mamurda “Rahina Saraswati Pinaka Cihna Ilmu Pengetahuan Sane Nerangin Kauripan”.

Inggih ratu ida dane sane baktinin titiang, rahina Saraswati, rauhnyane ring Saniscara Umanis Wuku Watu Gunung, sane kalaksanayang nem sasih puniki. Pinaka akeh umat Hindu sami pada astiti bakti, nunas ring Ida Sang Hyang Aji Saraswati sane pinaka manifestasi ring Ida Sang Hyang Widhi mangda ngemolihang kaweruhan sane mawiguna pisan ritatkala anggen nabdabang jagat. Sane mangkin tegesan titiang kruna “Saraswati” puniki mawit saking basa Sansekerta inggih punika kruna “Saras” sane mapiteges “mengalir” umpami toya utawi bebaos lan “Wati” tegesnyane “ngelahang” utawi “memiliki”. Dados ipun Saraswati mapiteges aliran toya utawi bebaos sane ngelimpahin danau utawi kolam. Pateh sekadi ilmu pengetahuan sane nenten telas-telas ring jagate puniki.

            Nyangra piodalan Saraswati puniki, kelaksanayang antuk media sane ngingetin utawi nyadaran para umat Hindune manda eling teken ilmu pengetahuan ring jagate puniki, riantukan ilmu pengetahuan pinaka dasar sane kaangge nyalanin kauripan. Pengetahuan inggih punika sarana sane nganutin sejeroning keuripan lan ningkatin kualitas spiritual mangda prasida ngemolihan keuripan sane becik. Wenten kruna utawi bebaos sane anyar nenten madue makna utawi arti ritatkala nenten dasarin sareng ilmu pengetahuan. Punika mawinan ilmu pengetahuan penyebab utama sane nyidang dados dasar antuk manusa sane ngemolihang kewicaksanayang sane merupa landasan utawi pedoman antuk ngemolihang kerahayuan lahir bathin.

Ratu ida dane sareng sami, tetujon ngelaksanayang pamuspan utawi nyangra rahina piodalan Saraswasti, tan lian wantah ngaturang suksma ring Ida Sang Hyang Widhi, utama ipun majeng ring Dewi Saraswati, riantuk ledang mepaica kaweruhan ring iraga sareng sami. Manut sekadi ring lontar Purwadhi Gama, tetujon ring rahina Saraswati punika antuk ningkatin idep utawi intelektualitas iraga sareng sami mangda prasida ngemolihan jiwa lan moral sane pinih becik ring jagate puniki.

Kelaksanayang upacara ring rahina Saraswati puniki, umat Hidu ring Bali kelaksanayang antuk ngaturang upakara ring lontar-lontar lan kitab-kitab sastra agama, miwah buku-buku ilmu pengetahuan sane lianan, pinaka cihna ilmu pengetahuan sane nerangin kauripan jagat manusa puniki. Akeh umat Hindu ring Bali naenan “Aksara” pinaka lambang Sthana Sang Hyang Aji Saraswati. Aksara sane wenten ring lontar-lontar utawi buku-buku inggih punika aksara-aksara sane merupa ilmu pengetahuan minakadi Apara Widya utawi Para Widya. Apara Widya punika ilmu pengetahuan sane nengahin ciptaan Ida Sang Hyang Widhi, mawit pengetahuan sane ngewentenan Bhuwana Agung lan Bhuwana Alit. Para Widya inggih punika ilmu pengetahuan sane ngajahin hakekat Ida Sang Hyang Widhi.

            Maosang indik agama, tan prasida lepas saking Tri Kerangka Agama, inggih punika Tattwa, Susila, lan Upakara. Upacarane punika cihnan anake meagama. Minakadi upacara piodalan Saraswati. Semengane iraga mebakti lan buku-buku kaupacara tan kalugra kawacen yening sampun wengi wawu raris ngemargiang semadi utawi ngewacen buku-buku suci sane matotujon ngenemuang pencerahan ring Ida Hyang Aji Saraswati, raris benjang semengane mebanyu pinaruh, kamargiang antuk mesiram ke tukad utawi ke segara mekeramas, raris nunas tirta kaweruhan saha ngembaliang lontar-lontar miwah buku-buku ring genah ipun soang-soang.

Inggih ratu ida dane sareng sami sane wangiang titiang wantah asapunika titiang prasida matur ring galahe sane becik puniki, mogi-mogi titiang sareng ratu  ida dane sinamian setate ngemolihang kerahejengan lan kerahayuan. Malih asiki titiang matur suksma antuk uratian ratu ida dane sareng sami. Maka kirang langkung atur titiang, ritatkala wenten atur lan parilaksana titiang sane nenten manut ring ajeng, lugrayang titiang ngalungsur sinampura. Dumogi napi sane aturang titiang wenten pikeneh nyane. Pamuput titiang sineb antuk paramasantih.

OM SANTHI, SANTHI, SANTHI, OM